Նորություններ

RSS
image

16.10.2020

ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴԸ ԿՈՉՈՎ ԴԻՄԵԼ Է ԵՄ ԴԱՏԱԿԱՆ ԽՈՐՀՈՒՐԴՆԵՐԻ ՄԻՈՒԹՅԱՆԸ

Հարգելի՛ պարոն Դոնատի և գործընկերներ

Դիմում ենք ձեզ՝ համոզված լինելով, որ դուք պետք է տեղեկացված լինեք այն աղաղակող և դատապարտելի իրադարձությունների մասին, որոնք ներկայումս ծավալվում են Արցախում (Լեռնային Ղարաբաղում), քանի որ դրանք աննախադեպ են մինչ այժմ մարդկության կողմից ընդունված և մարդկային քաղաքակիրթ գոյությունն ապահովող միջազգային իրավունքի նորմերի խախտումների ծավալներով, կոպտությամբ և դրսևորման ցինիզմով։

Ցանկացած պատկերացումից դուրս է, որ ժամանակակից աշխարհում տեղի է ունենում էթնիկ բնակչության բնաջնջման անթաքույց փորձ և Արցախում (Լեռնային Ղարաբաղում) ապրող հայերի կյանքի իրավունքի խախտում:

Թուրքիայի լիարժեք աջակցությամբ`Ադրբեջանի քաղաքական ղեկավարության կողմից նախօրոք պլանավորված լայնածավալ ռազմական ագրեսիայի սանձազերծումը հետապնդում է հստակ ցեղասպան նպատակներ: Աշխարհի աչքի առջև Արցախի (Լեռնային Ղարաբաղի) խաղաղ բնակչության նկատմամբ օգտագործվում են միջազգային հումանիտար իրավունքի նորմերով արգելված զինատեսակներ, նենգաբար ավերվում են քաղաքներ, ոչնչացվում են մշակութային օբյեկտներ, զոհվում են անզեն մարդիկ, կանայք ու երեխաներ. փաստեր, որոնց ապացույցներն ակնհայտ են և անհերքելի։ Ադրբեջանի զինված ուժերն ավիահարվածներ են հասցրել Սուրբ Ամենափրկիչ Ղազանչեցոց եկեղեցուն (կառուցված 1887թ.)` պատճառելով զգալի վնասներ, որից տուժել են խաղաղ բնակչությունը և իրենց մասնագիտական պարտքը կատարող լրագրողներ:

Միջազգային հանրության կողմից արդեն հաստատվել է, որ այս վայրագությունները իրականացվում են հիմնականում միջազգային ահաբեկչական կազմակերպություններից Ադրբեջան տեղափոխված հազարավոր վարձկանների միջոցով, որոնք ակնհայտորեն գործում են Ադրբեջանի ու Թուրքիայի ղեկավարության հովանավորչությամբ։

Ահաբեկչությունը չունի ազգային, կրոնական, սոցիալական նկարագիր, ահաբեկչության դեմ պայքարն առաջնահերթություն է բոլոր քաղաքակիրթ երկրներում: Այդուհանդերձ, ահաբեկչությունից ապահովագրված չէ և ոչ մի երկիր։ Դատական իշխանություններն ամբողջ Եվրոպայում կարևոր դերակատարություն ունեն ահաբեկչության դեմ արդյունավետ պայքարում:

Մենք հավատում ենք, որ մեր գործընկերները ողջ Եվրոպայում չպետք է լուռ դիտորդի կարգավիճակով հետևեն թուրք-ադրբեջանական միլիտարիստների կողմից եվրոպական ընտանիքի մաս հանդիսացող հայ ազգի և նրա կողմից հազարամյակների ընթացքում ձևավորած եզակի մշակութային ժառանգության ոչնչացման անթաքույց փորձին:

Ադրբեջանի կողմից հայերի նկատմամբ ատելության հողի վրա հանցագործություններ կատարողների փառաբանումը, քաղաքական առաջնորդների, կրթական հաստատությունների և լրատվամիջոցների կողմից ատելության խոսքի համակարգային օգտագործումը փաստվել է միջազգային կազմակերպությունների, այդ թվում՝ Եվրոպայի խորհրդի Ռասիզմի և անհանդուրժողականության դեմ եվրոպական հանձնաժողովի և «Ազգային փոքրամասնությունների պաշտպանության մասին» շրջանակային կոնվենցիայի խորհրդատվական հանձնաժողովի կողմից:

Մարդու իրավունքների եվրոպական դատարանը 2020թ.-ի հոկտեմբերի 6-ին բավարարել է ՀՀ կառավարության պահանջը և կիրառել է միջանկյալ միջոց՝ կոչ անելով ուղղակի կամ անուղղակի ներգրավված բոլոր երկրներին, այդ թվում՝ Թուրքիային, զերծ մնալ քաղաքացիական բնակչության՝ Կոնվենցիայով պաշտպանվող իրավունքները խախտելուց։

Ձեր ուշադրությունն ենք հրավիրում նաև այն հանգամանքի վրա, որ չնայած հոկտեմբերի 10-ին հումանիտար հրադադարի մասին ձեռքբերված համաձայնությանը՝ Ադրբեջանը շարունակել է անդադար ռմբակոծել և հարձակվել խաղաղ բնակավայրերի վրա՝ վիրավորելով և սպանելով քաղաքացիական անձանց:

Այլևս ակնհայտ է, որ այս փոքր տարածքում ահաբեկչության հաղթանակը հղի է վտանգավոր հետևանքներով ինչպես տարածաշրջանի, այնպես էլ Եվրոպայի և ողջ քաղաքակիրթ աշխարհի համար։

Կոչ ենք անում ձեռնարկել անհապաղ քայլեր դատապարտելու թուրք-ադրբեջանաահաբեկչական ագրեսիան ու վայրագությունները և ձեր ներդրումն ունենալ Արցախի (Լեռնային Ղարաբաղի) ժողովրդի դեմ սանձազերծված ցեղասպան պատերազմի անհապաղ դադարեցման գործում:

 

----------------------------------------------------------------------------------------------------------------------------------------------------------------------------------

 

 SJC'S APPEAL TO ENCJ

 

To: President Filippo Donati

European Network of Councils for the Judiciary

Cc: ENCJ Members

 

 

Dear President Donati and colleagues,

We are appealing to you in belief that ENJC’s and its members shall be informed of the terrifying and tragic events happening these days in Nagorno-Karabakh (Artsakh), due to the unprecedented extent, rude and cynic scale of violations of international law and human rights.

It goes beyond any imagination that in the modern world an unhidden attempt of extermination of the ethic population and application of terror against the right to life of Armenians living in Nagorno-Karabakh (Artsakh).

The pre-planned large-scale military aggression unleashed by the authoritarian regime of Azerbaijan with full backing of Turkey pursues clear genocidal intent. In front of the whole world weapons prohibited by the international humanitarian law are used against peaceful civilians in Nagorno-Karabakh (Artsakh), cities and villages are treacherously destroyed, cultural objects are being demolished, unarmed people including women and children are being killed, the evidence of which is obvious and undeniable. The armed forces of Azerbaijan launched airstrikes at the Holy Savior Ghazanchetsots Cathedral (opened since 1887) and House of Culture in Shushi causing significant damages and wounding peaceful civilians, including journalists.

It has already been recognized by the international community that all these atrocities are committed also through thousands of mercenaries transferred to Azerbaijan from terroristic organizations, including ISIS-linked terrorist groups, which apparently operate under the auspices of the Azerbaijan and Turkish leaderships.

Terrorism does not have a national, religious, social description, the fight against terrorism is a priority in all civilized countries. Yet, no one is ensured from the danger to face terrorism. Judiciaries across Europe play important role in effective fight against terrorism.

We believe, that our fellow colleagues throughout Europe shall not silently observe the undisguised try of Turk – Azeri militarists to slaughter the Armenian nation of big European family and erase unique cultural heritage formed over thousands of centuries.

Glorification of perpetrators of hate crimes by Azerbaijan against Armenians, systemic use of hate speech by political leaders, educational institutions and media have been documented by international organizations, including the European Commission against Racism and Intolerance of the Council of Europe and Advisory Committee of the Framework Convention for the Protection of National Minorities.

On October 6th of 2020, the European Court of Human Rights satisfied the request lodged by the Government of the Republic of Armenia for interim measure, calling on all states directly or indirectly involved in the conflict, including Turkey, to refrain from actions that contribute to breaches of the Convention rights of civilians and to respect their obligations under the Convention.

Please note, that notwithstanding the ceasefire agreed on October 10, Azerbaijan uninterruptedly continues bombing, attacking, wounding and killing civilians. It is now obvious that the victory of terrorism in this small territory is fraught with detrimental consequences for both the region, Europe and the entire civilized world at large.

We urge for your immediate action in condemning aggression and violence and contribution to the termination of the genocidal war in Nagorno-Karabakh (Artsakh).

 

Sincerely Yours                                                               Rouben Vardazaryan

image

15.10.2020

ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴՆ ԸՆՏՐԵԼ Է ՀՀ ՎՃՌԱԲԵԿ ԴԱՏԱՐԱՆԻ ՆԱԽԱԳԱՀԻ ԹԵԿՆԱԾՈՒ

 

Բարձրագույն դատական խորհրդի հոկտեմբերի 15-ին կայացած նիստում, «ՀՀ դատական օրենսգիրք» սահմանադրական օրենքի 135-րդ հոդվածի դրույթներին համապատասխան, ընտրվել է ՀՀ վճռաբեկ  դատարանի նախագահի թեկնածու:

Քվեարկության արդյունքներով՝ ՀՀ վճռաբեկ դատարանի նախագահի թեկնածու է ընտրվել ՀՀ վճռաբեկ դատարանի քրեական պալատի նախագահ Լիլիթ Թադևոսյանը:

Բարձրագույն դատական խորհուրդը Վճռաբեկ դատարանի նախագահի թեկնածուի վերաբերյալ համապատասխան փաստաթղթերն օրենքով սահմանված կարգով և ժամկետներում կներկայացնի Ազգային ժողով:

 

Բարձրագույն դատական խորհրդի աշխատակազմի մամուլի և հասարակայնության հետ կապերի ծառայություն

image

07.10.2020

ԴԱՏԱԿԱՆ ԻՇԽԱՆՈՒԹՅՈՒՆԸ ՄԻԱՑԵԼ Է ՀԱՄԱԶԳԱՅԻՆ ԴՐԱՄԱՀԱՎԱՔԻՆ

Հայաստանի Հանրապետության դատական իշխանությունը ևս մասնակցել է «Մենք ենք, մեր սահմանները. բոլորս Արցախի համար» խորագրով համազգային դրամահավաքին:

Բարձրագույն դատական խորհրդի, Դատավորների, Դատական դեպարտամենտի կողմից հավաքագրվել է 22.340.000 ՀՀ դրամ և այսօր փոխանցվել Արցախի Հանրապետության ֆինանսների նախարարության գանձապետական հաշվեհամարին՝ ի նպաստ հայրենիքի պաշտպանության և հայոց բանակի հզորացման:

Միևնույն ժամանակ, մեր սատարումն ու անվերապահ աջակցությունն ենք հայտնում մեր պետությանը և կանգնած ենք հայ զինվորի, Հայաստան աշխարհի, Արցախի կողքին:

 

#Հաղթելուենք

image

25.09.2020

ՀԱՅՏԱՐԱՐՈՒԹՅՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎՃՌԱԲԵԿ ԴԱՏԱՐԱՆՈՒՄ ԴԱՏԱՎՈՐ ՆՇԱՆԱԿՎԵԼՈՒ ՀԱՄԱՐ ԱՌԱՋԽԱՂԱՑՄԱՆ ԵՆԹԱԿԱ ԴԱՏԱՎՈՐՆԵՐԻ ԹԵԿՆԱԾՈՒՆԵՐԻ ՑՈՒՑԱԿԻ ԿԱԶՄՄԱՆ ՎԵՐԱԲԵՐՅԱԼ

«Հայաստանի Հանրապետության դատական օրենսգիրք» սահմանադրական օրենքի 132-րդ հոդվածի 1-ին մասի համաձայն` Վճռաբեկ դատարանի դատավորի պաշտոնավարման ժամկետը լրանալուց ոչ շուտ, քան երկու ամիս և ոչ ուշ, քան մեկ ամիս առաջ, իսկ այլ հիմքով Վճռաբեկ դատարանում դատավորի թափուր տեղ առաջանալու օրվանից մեկշաբաթյա ժամկետում Բարձրագույն դատական խորհուրդը հրապարակային ծանուցումների պաշտոնական ինտերնետային կայքում և դատական իշխանության պաշտոնական կայքում հրապարակվում է հայտարարություն, որն առնվազն պետք է պարունակի դիմումներն ընդունելու ժամկետը, վայրը, համալրման ենթակա տեղերի քանակը:

Սույն հայտարարությունը հրապարակելու պահին Վճռաբեկ դատարանում առկա է դատավորի 1 (մեկ) թափուր տեղ` քաղաքացիական և վարչական մասնագիտացմամբ:

Վճռաբեկ դատարանում դատավոր նշանակվելու համար առաջխաղացման ենթակա դատավորների թեկնածուների ցուցակում կարող են ընդգրկվել «Հայաստանի Հանրապետության դատական օրենսգիրք» սահմանադրական օրենքի 132-րդ հոդվածի 2-րդ մասում նշված անձինք:

«Հայաստանի Հանրապետության դատական օրենսգիրք» սահմանադրական օրենքի 132-րդ հոդվածի 2-րդ մասի 1-ին կետով նշված անձինք Բարձրագույն դատական խորհուրդ ներկայացնում են միայն դիմում, իսկ նույն հոդվածի 2-րդ մասի 2-րդ և 3-րդ կետերով նշված անձինք դիմումին կից  ներկայացնում են «Հայաստանի Հանրապետության դատական օրենսգիրք» սահմանադրական օրենքի 98-րդ հոդվածի 2-րդ մասով և նույն օրենսգրքի 132-րդ հոդվածի 5-րդ և 6-րդ մասերով սահմանված փաստաթղթերը:

Հայտարարության հրապարակումից հետո` երկշաբաթյա ժամկետում, մինչև սույն թվականի հոկտեմբերի 12-ը  ներառյալ վերը նշված անձինք առաջխաղացման ենթակա դատավորների թեկնածուների ցուցակում ընդգրկվելու մասին կարող են դիմում ներկայացնել Բարձրագույն դատական խորհուրդ:

 

ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴ

 

Ծանոթություն.

Դիմումները ներկայացնել Դատական դեպարտամենտ՝ ք.Երևան, Կորյունի 17:

Հարցեր առաջանալու դեպքում կարող եք զանգահարել

/010/ 511-778 հեռախոսահամարով կամ նամակ ուղարկել info@court.am էլեկտրոնային փոստի հասցեով:

image

25.09.2020

ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴՆ ԱՐՏԱԳՆԱ ՆԻՍՏ Է ԱՆՑԿԱՑՐԵԼ ՍՅՈՒՆԻՔԻ ՄԱՐԶՈՒՄ

Սեպտեմբերի 17-ից 18-ը Բարձրագույն դատական խորհուրդը՝ նախագահ Ռուբեն Վարդազարյանի գլխավորությամբ Սյունիքի մարզում էր: Աշխատանքային խմբում էին՝ Բարձրագույն դատական խորհրդի անդամներ Անի Մխիթարյանը, Լիպարիտ Մելիքջանյանը, Վիգեն Քոչարյանը, Մեսրոպ Մակյանը, Գրիգոր Բեքմեզյանը, Դատական դեպարտամենտի ղեկավար Կարեն Փոլադյանը, Դատական կարգադրիչների ծառայության պետ Ռոբերտ Ղազարյանը:

Այցի շրջանակներում կայացավ հանդիպում Սյունիքի մարզի առաջին ատյանի ընդհանուր իրավասության դատարանի նախագահի, դատավորների և աշխատակազմի հետ։ Բարձրագույն դատական խորհրդի նախագահը դատարանի նախագահին և դատավորներին ներկայացրեց նորանշանակ դատավորներ Բորիս Բախշիյանին, Էմին Աբգարյանին, Ռոմեն Ահարոնյանին և Կարապետ Բադալյանին: Դատավորի բարդ և պատասխանատու լիազորությունները ստանձնելու կապակցությամբ նորանշանակ դատավորներին շնորհավորելով ՝ Խորհրդի նախագահը և խորհրդի անդամները հույս հայտնեցին, որ նրանք, համալրելով Սյունիքի մարզի առաջին ատյանի ընդհանուր իրավասության դատարանի կազմը, իրենց ամենօրյա աշխատանքով կնպաստեն արդարադատական գործընթացների պատշաճ իրականացմանը, դատական իշխանության հեղինակության և արժանապատիվ դատավորի կերպարի հասարակական ընկալման բարձրացմանը:

Մարզային դատարանում կայացած խորհրդակցության ժամանակ քննարկվեցին արդյունավետ արդարադատություն ունենալու գործիքակազմերը, դատական համակարգում առկա խնդիրները, դրանց լուծման հնարավոր ուղիները: Դատավորների կողմից ներկայացվեցին նաև ոլորտում նկատելի խնդիրների հաղթահարման առաջարկություններ:

Նշվեց, որ Խորհուրդը քաջատեղյակ է դատավորներին հուզող հարցերին, և գործուն քայլեր են ձեռնարկվում առաջնահերթ խնդիրներին հնարավորինս արագ լուծում տալու ուղղությամբ: Մի շարք հարցեր տեղում ստացան լուծումներ:

Կարևորվեց նաև էլեկտրոնային արդարադատության համակարգի ներդրմամբ դատական իշխանության արդյունավետության և հանրային հաշվետվողականության բարձրացման ապահովումը:

Ամփոփելով խորհրդակցությունը Բարձրագույն դատական խորհրդի նախագահը կոնկրետ հանձնարարականներ և ցուցումներ տվեց դատարանի նախագահին, աշխատակազմին, Դատական դեպարտամենտի ղեկավարին և կարգադրիչների ծառայության պետին:

Այնուհետև Բարձրագույն դատական խորհուրդն անցկացրեց խորհրդի նիստ: Օրակարգում առկա հարցերի վերաբերյալ կայացվեցին համապատասխան որոշումներ:   

Աշխատանքային այցի շրջանակներում Բարձրագույն դատական խորհրդի նախագահն ու անդամները շրջայց կատարեցին Սյունիքի մարզի առաջին ատյանի ընդհանուր իրավասության դատարանի նաև Գորիսի և Կապանի նստավայրերում, տեղում ծանոթացան նստավայրերի շենքային պայմաններին, գրասենյակի, արխիվի և կարգադրիչների ծառայության աշխատանքների կազմակերպման գործընթացին: