Նորություններ

RSS
image

27.09.2019

ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴՆ ԱՐՏԱԳՆԱ ՆԻՍՏ Է ԱՆՑԿԱՑՐԵԼ

Բարձրագույն դատական խորհուրդը երեկ՝ սեպտեմբերի 26-ին, արտագնա նիստ անցկացրեց Գյումրիում։ Խորհուրդը հանդիպեց Շիրակի մարզի առաջին ատյանի ընդհանուր իրավասության դատարանի նախագահի և դատավորների հետ։

Հանդիպում-խորհրդակցության ժամանակ քննարկվեցին արդյունավետ արդարադատություն ունենալու գործիքակազմերը, դատական համակարգում առկա խնդիրները, դրանց լուծման հնարավոր ուղիները:

Անդրադարձ եղավ դատավորներին հետաքրքրող տարբեր հարցերի ևս: Հիմնականում ուշադրության առանցքում էին դատավորների ծանրաբեռնվածությունը բեռնաթափելու անհրաժեշտությունը, գործերի բաշխման կարգը:

Նշվեց, որ Խորհուրդը քաջատեղյակ է դատավորներին հուզող հարցերին, և գործուն քայլեր են ձեռնարկվում առաջնահերթ խնդիրներին հնարավորինս արագ լուծում տալու ուղղությամբ: Կարևորվեց նաև էլեկտրոնային արդարադատության համակարգի ներդրմամբ դատական իշխանության արդյունավետության և հանրային հաշվետվողականության բարձրացման ապահովումը:

Հանդիպման ժամանակ տեղի ունեցավ բաց քննարկում: Դատավորների կողմից ներկայացվեցին նաև ոլորտում նկատելի խնդիրների հաղթահարման առաջարկություններ:  

Աշխատանքային հանդիպման ավարտին Բարձրագույն դատական խորհրդի նախագահն ու անդամները շրջայց կատարեցին Շիրակի մարզի առաջին ատյանի ընդհանուր իրավասության դատարանի Գյումրու և Մարալիկի, ինչպես նաև Արագածոտնի մարզի առաջին ատյանի ընդհանուր իրավասության դատարանի Թալինի նստավայրերում, տեղում ծանոթացան գրասենյակի, արխիվի և կարգադրիչների ծառայության աշխատանքների կազմակերպման գործընթացին:

 

Բարձրագույն դատական խորհրդի աշխատակազմի մամուլի և հասարակայնության հետ կապերի ծառայություն

image

24.09.2019

ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴՆ ՀՅՈՒՐԸՆԿԱԼԵԼ Է ՀԱՄԱՇԽԱՐՀԱՅԻՆ ԲԱՆԿԻ ՊԱՏՎԻՐԱԿՈՒԹՅԱՆԸ

Այսօր՝ սեպտեմբերի 24-ին, Բարձրագույն դատական խորհրդում տեղի ունեցավ աշխատանքային հանդիպում Համաշխարհային բանկի ներկայացուցիչների հետ:

Պատվիրակությանը՝ Համաշխարհային բանկի կառավարման մասնագետ Դանիելա Ֆելքմանի գլխավորությամբ, ընդունեցին Խորհրդի նախագահ Ռուբեն Վարդազարյանը, Խորհրդի անդամներ Անի Մխիթարյանը, Հայկ Հովհաննիսյանը և Դատական դեպարտամենտի ղեկավար Կարեն Փոլադյանը:

Հանդիպման նպատակն էր դատաիրավական համակարգի և հակակոռուպցիոն ռազմավարությանն առնչվող հարցերի քննարկումը, արդարադատության ոլորտի բարեփոխումների հարցում Համաշխարհային բանկի կողմից հնարավոր օժանդակության ու տեխնիկական աջակցության շրջանակների հստակեցումը: Անդրադարձ եղավ նաև արդարադատության ոլորտի ֆունկցիոնալ ուսումանսիրության նպատակով էլ-հարցման անցկացման հարցում Խորհրդի աջակցության կարևորությանը:

Ողջույնի իր խոսքում՝ Խորհրդի նախագահն ընդգծեց դատաիրավական ոլորտում Համաշխարհային բանկի հետ ունեցած երկարամյա արդյունավետ համագործակցությունը՝ վստահություն հայտնելով, որ այն շարունակվելու է և տալու է իր պտուղները: Ռուբեն Վարդազարյանն իր խոսքում նաև նկատեց, որ այսօր Բարձրագույն դատական խորհուրդը կառավարության կողմից ընկալվում է որպես վստահելի գործընկեր և, որպես դատական իշխանության քաղաքականությունը որոշող սահմանդրական մարմին, ցանկություն կա անմիջական և ուղիղ աշխատելու միջազգային բոլոր գործընկերի հետ:

Դանիելա Ֆելքմանը, շնորհակալություն հայտնելով Խորհրդին ջերմ ընդունելության և համագործակցության պատրաստակամության համար, կարևորեց Բարձրագույն դատական խորհրդի դերը արդարադատության ոլորտի զարգացման գործում:

Հանդիպման ավարտին տեղի ունեցավ մտքերի փոխանակում, քննարկվեցին գործնական նշանակության այլ հարցեր ևս:

 

Բարձրագույն դատական խորհրդի աշխատակազմի մամուլի և հասարակայնության հետ կապերի ծառայություն

image

17.09.2019

ՀՀ ՎՃՌԱԲԵԿ ԴԱՏԱՐԱՆԻ ՆԱԽԱԳԱՀՆ ԸՆԴՈՒՆԵԼ է ՎԵՆԵՏԻԿԻ ՀԱՆՁՆԱԺՈՂՈՎԻ ՊԱՏՎԻՐԱԿՈՒԹՅԱՆԸ

Սեպտեմբերի 16-ին ՀՀ վճռաբեկ դատարանի նախագահ Երվանդ Խունդկարյանն ընդունել է «Ժողովրդավարություն՝ իրավունքի միջոցով» եվրոպական հանձնաժողովի (Վենետիկի հանձնաժողով) պատվիրակության ներկայացուցիչներին:

Հանդիպմանը մասնակցել են նաև ՀՀ վճռաբեկ դատարանի քաղաքացիական և վարչական պալատի նախագահ Ռուզաննա Հակոբյանը և քրեական պալատի նախագահ Լիլիթ Թադևոսյանը:

Քննարկմանն անդրադարձ է կատարվել Հայաստանի դատաիրավական բարեփոխումների և հակակոռուպցիոն ռազմավարությունների նախագծերին և այդ համատեքստում Վենետիկի հանձնաժողովի ունեցած դերին ու գործառութային հնարավորություններին:

image

17.09.2019

ՀԱՅՏԱՐԱՐՈՒԹՅՈՒՆ

Սույն թվականի սեպտեմբերի 18-ին՝ ժամը 18:30-ին, Երևան քաղաքի առաջին ատյանի ընդհանուր իրավասության դատարանի Աջափնյակ նստավայրում (հասցեն՝ ք. Երևան, Նազարբեկյան թաղամաս 40) տեղի կունենա Բարձրագույն դատական խորհրդի հանդիպումը Երևան քաղաքի առաջին ատյանի ընդհանուր իրավասության դատարանի դատավորների հետ:

Կքննարկվեն դատական իշխանության առաջնահերթ խնդիրները, ոլորտային մի շարք այլ հարցեր:

Հանդիպումը բաց է Զանգվածային լրատվության միջոցների ներկայացուցիչների համար:

 

Բարձրագույն դատական խորհրդի աշխատակազմի մամուլի և հասարակայնության հետ կապերի ծառայություն

image

16.09.2019

ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴՆ ԸՆԴՈՒՆԵԼ է ՎԵՆԵՏԻԿԻ ՀԱՆՁՆԱԺՈՂՈՎԻ ՊԱՏՎԻՐԱԿՈՒԹՅԱՆԸ

Այսօր՝ սեպտեմբերի 16-ին, Բարձրագույն դատական խորհրդում տեղի ունեցավ հանդիպում «Ժողովրդավարություն՝ իրավունքի միջոցով» եվրոպական հանձնաժողովի (Վենետիկի հանձնաժողով) պատվիրակության ներկայացուցիչների հետ:

Պատվիրակության անդամներին՝ Գրիգորի Դիկովին, Նիկոլա Եսանուն, Յոհան Հիրշֆելդին, Մարտին Կույջերին, Լիլիթ Դանեղյանին, ընդունեցին Խորհրդի նախագահ Ռուբեն Վարդազարյանը, Խորհրդի անդամներ Լիպարիտ Մելիքջանյանը, Գրիգոր Բեքմեզյանը, Անի Մխիթարյանը, Վիգեն Քոչարյանը, Հայկ Հովհաննիսյանը:

Քննարկվեցին Հայաստանում դատաիրավական և հակակոռուպցիոն ոլորտի բարեփոխումների իրականացման ռազմավարությանը, այդ գործընթացում Բարձրագույն դատական խորհրդի ունեցած առաքելությանը, դատաիրավական համակարգի առանցքային հարցերի շուրջ Վենետիկի հանձնաժողովի ունեցած դերին վերաբերող մի շարք հարցեր:

Տեղի ունեցավ նաև մտքերի փոխանակում համագործակցության և ոլորտային այլ հարցերի շուրջ:

 

Բարձրագույն դատական խորհրդի աշխատակազմի մամուլի և հասարակայնության հետ կապերի ծառայություն