Նորություններ

RSS
image

09.12.2019

ՎՃՌԱԲԵԿ ԴԱՏԱՐԱՆՈՒՄ ՀՅՈՒՐԸՆԿԱԼԵԼ ԷԻՆ ՀԱՄԱԼՍԱՐԱՆԱԿԱՆՆԵՐԻՆ

Վճռաբեկ դատարանում դատարանի նախագահ Երվանդ Խունդկարյանը դեկտեմբերի 6-ին բաց քննարկում ծավալեց ԵՊՀ իրավագիտության ֆակուլտետի տարբեր կուրսերի ուսանողների հետ:

Ողջունելով ուսանողների նախաձեռնությունը՝ Երվանդ Խունդկարյանն ընդհանուր գծերով ներկայացրեց Վճռաբեկ դատարանի՝ որպես բարձրագույն դատական ատյանի սահմանադրական առաքելությունը, կառուցվածքը, օրենսդրությամբ վերապահված լիազորությունների շրջանակը, բողոքների վարույթ ընդունելու ընթացակարգերը, օրենքի մեկնաբանման առանձնահատկությունները, ինչպես նաև խոսեց Վճռաբեկ դատարանի նախադեպային իրավունքի ինստիտուտի մասին:

Երվանդ Խունդկարյանի հարցին, թե ուսանողներից քանիսը կցանկանար հետագայում դառնալ դատավոր, ներկաներից դրական պատասխան քչերը տվեցին: Վճռաբեկ դատարանի նախագահն էլ նկատեց, որ դատավորի աշխատանքը ցանկացած պրոֆեսիոնալի համար պետք է լինի երազելի աշխատանք, քանզի դատավորն է, որ գնահատկան է տալիս ցանկացած կառույցի կամ վարչական մարմնի կատարած գործողությունների օրինականությանը:

Նա կարևորեց նաև դատավորների դերի հանրային ընկալման գործոնը՝ նկատելով, որ իրենց ասելիքը հանրությանը դատավորները պետք է ներկայացնեն միայն իրենց ընդունած դատական ակտերով և իր համոզմամբ՝ դատավորները սոցիալական հարթակներում անելիք չունեն:

Ապագա իրավաբաններին հետաքրքրող հարցերի շրջանակն ընդգրկուն էր՝ նեղ մասնագիտական հարցերից մինչև դատավորների ծանրաբեռնվածություն, դատարանի շենքային պայմաններ:

Հանդիպման ավարտին Երվանդ Խունդկարյանի մաղթանքը ուսանողներին հետևյալն էր՝ երբեք չխուսափել հիմնավորված սեփական մտքերն անկաշկանդ արտահայտելուց:

Անմիջական զրույցից զատ ուսանողները շրջայց կատարեցին Վճռաբեկ դատարանի շենքում, եղան գրադարանում, նիստերի սպիտակ և կարմիր դահլիճներում:

 

Բարձրագույն դատական խորհրդի աշխատակազմի մամուլի և հասարակայնության հետ կապերի ծառայություն

image

06.12.2019

ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴՆ ՀՅՈՒՐԸՆԿԱԼԵԼ Է ԱՆՆԱ ԴՈԼԻՁԵԻՆ

Բարձրագույն դատական խորհուրդը ոչ պաշտոնական ձևաչափով դեկտեմբերի 5-ին հյուրընկալեց երկօրյա այցով Հայաստանում գտնվող Վրաստանի արդարադատության բարձրագույն խորհրդի անդամ Աննա Դոլիձեին:

Խորհրդի նախագահ Ռուբեն Վարդազարյանը և Խորհրդի անդամներ Անի Մխիթարյանը, Գրիգոր Բեքմեզյանը և Սերգեյ Չիչոյանը վրացի գործընկերոջ հետ քննարկեցին Հայաստանի դատական իշխանության կարևոր հարցերն ու առկա մարտահրավերները: Աննա Դոլիձեն իր հերթին ներկայացրեց Վրաստանի դատական ​​համակարգի օրակարգային խնդիրները և բարեփոխմանն առնչվող հարցերը:

Հանդիպման ավարտին գործընկերները ձեռք բերեցին պայմանավորվածություն հետագա համագործակցության վերաբերյալ:

 

Բարձրագույն դատական խորհրդի աշխատակազմի մամուլի և հասարակայնության հետ կապերի ծառայություն

 

image

06.12.2019

ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴՆ ԸՆԴՈՒՆԵԼ Է ՌՈՒՍԱՍՏԱՆԻ ԱՐՏԱԿԱՐԳ ԵՎ ԼԻԱԶՈՐ ԴԵՍՊԱՆԻՆ

Բարձրագույն դատական խորհուրդը դեկտեմբերի 5-ին ընդունեց Ռուսաստանի արտակարգ և լիազոր դեսպան Սերգեյ Կոպիրկինին և Հայաստանում Ռուսաստանի դեսպանատան հյուպատոսական բաժնի ղեկավար, խորհրդական Անդրեյ Շանինին:

Հանդիպմանը մասնակցում էին Խորհրդի նախագահ Ռուբեն Վարդազարյանը, Խորհրդի անդամներ Լիպարիտ Մելիքջանյանը, Հայկ Հովհաննիսյանը, Անի Մխիթարյանը, Գիրգոր Բեքմեզյանը և Սերգեյ Չիչոյանը:

Ողջունելով հյուրերին՝ Խորհրդի նախագահ Ռուբեն Վարդազարյանը ներկայացրեց Խորհրդի լիազորությունների շրջանակը, գործունեության հիմնական կառուցակարգերը, արված լայնածավալ աշխատանքները և օրենսդրական նախաձեռնությունները, որոնց նպատակն արդարադատությունն արդյունավետ դարձնելն է: Նա իր խոսքում կարևորեց, որ դատական իշխանությունն ապաքաղաքական կառույց է, և Խորհուրդն իր ամենօրյա բաց, թափանցիկ աշխատանքով, չմիջամտելով արդարադատական գործընթացին, քայլեր է ձեռնարկում դատարանների անկախությունն ամրապնդելու ուղղությամբ:

Խորհրդի նախագահը նաև նշեց, որ միջազգային գործընկերների հետ սերտ կապերի հաստատումն ու ակտիվ համագործակցությունը ևս առաջնային են Բարձրագույն դատական խորհրդի համար և հույս հայտնեց, որ դեսպանի միջոցով երկու երկրների դատական իշխանությունների գիտական և պրակտիկ հատվածների միջև կստեղծվեն համագործակցության նոր հնարավորություններ:

Դեսպան Կոպիրկինը, շնորհակալություն հայտնելով Խորհրդին հյուրընկալության համար, հետաքրքրվեց Հայաստանում դատաիրավական բարեփոխումների   իրականացման գործիքակազմերով և այդ գործընթացում Բարձրագույն դատական խորհրդի ունեցած դերով:

Ի պատասխան դեսպանի հարցին՝ Խորհրդի նախագահ Ռուբեն Վարդազարյանը նկատեց, որ դատաիրավական բարեփոխումների համալիր ծրագիրը բավականին հավակնոտ է, հայեցակարգային և ամբողջ ծավալով կյանքի կոչվելու պարագայում արդյունքը կլինի գոհացնող:

Քննարկվեցին էլեկտրոնային արդարադատության ոլորտում Ռուսաստանի ունեցած փորձը և այդ ուղղությամբ հետագա համագործակցության հեռանկարները: Խորհրդի անդամները ևս արտահայտեցին իրենց տեսակետները, եղան երկկողմ համագործակցության կառուցողական առաջարկներ:

 

Բարձրագույն դատական խորհրդի աշխատակազմի մամուլի և հասարակայնության հետ կապերի ծառայություն

image

27.11.2019

ԻՏԱԼԻԱՅԻ ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՐԴԻ ՊԱՏՎԻՐԱԿՈՒԹՅԱՆ ԱՅՑԸ ՎՃՌԱԲԵԿ ԴԱՏԱՐԱՆ

Վճռաբեկ դատարանի նախագահ Երվանդ Խունդկարյանը նոյեմբերի 26-ին ընդունեց Հայաստան ժամանած Իտալիայի բարձրագույն դատական խորհրդի պատվիրակությանը՝ փոխնախագահ Դավիթ Էրմինիի գլխավորությամբ: Հանդիպմանը մասնակցում էին նաև Վճռաբեկ դատարանի քաղաքացիական և վարչական պալատի նախագահ Ռուզաննա Հակոբյանը և քրեական պալատի նախագահ Լիլիթ Թադևոսյանը:

Ողջունելով հյուրերին՝ Երվանդ Խունդկարյանը շեշտեց տարբեր երկրների հետ համագործակցության կարևորությունը միջազգային լավագույն փորձի փոխանակման առումով: Նա իր խոսքում ներկայացրեց Վճռաբեկ դատարանի սահմանադրական առաքելությունը, պալատների գործունեության մեխանիզմները, պալատների կողմից բողոքների քննության և որոշումների ընդունման ընթացակարգերը, անդրադարձավ Վճռաբեկ դատարանի նախադեպային իրավունքի ինստիտուտի կարևորությանը:

Հյուրերը հետաքրքրվեցին Հայաստանի վճռաբեկ դատարանի կառուցվածքով, դատական իշխանության մեջ ունեցած դերով, Վճռաբեկ դատարան ներկայացվող տարեկան բողոքների քանակով:

Վճռաբեկ դատարանի քաղաքացիական և վարչական պալատի նախագահ Ռուզաննա Հակոբյանն իտալացի գործընկերներին ներկայացրեց պալատի գործունեությանն առնչվող տարբեր հարցեր:

Քրեական պալատի նախագահ Լիլիթ Թադևոսյանն էլ իր հերթին նկատեց, որ այսօր Հայաստանը գտնվում է դատաիրավական բարեփոխումների փուլում, որով նախատեսվում են լուրջ կառուցվածքային փոփոխություններ, օրենսդրական դաշտի վերանայում, և այդ իմաստով շատ են կարևորում միջազգային գործընկերների հետ արդյունավետ համագործակցությունը: Նա նաև նկատեց, որ քսան տարիների գործունեության ընթացքում Վճռաբեկ դատարանը մեծ դերակատարություն է ունեցել ոչ միայն մարդու իրավունքների պաշտպանության, այլև իրավունքի գերակայության զարգացման գործում:

Երկկողմ հետաքրքրություն ներկայացնող հարցադրումները բազմաբովանդակ էին և առարկայական: Հանդիպման ընթացքում քննարկվեցին նաև դատական իշխանություն-հանրություն շփումների արդյունավետ կազմակերպմանը, հանրային վստահության բարձրացմանը, դատավորի հեղինակության պաշտպանությանն ու կարգապահական վարույթներին առնչվող հարցեր:

Ամփոփիչ իր խոսքում Վճռաբեկ դատարանի նախագահ Երվանդ Խունդկարյանը շնորհակալություն հայտնեց հյուրերին կառուցողական քննարկման համար՝ հույս հայտնելով, որ Իտալիայի դատական իշխանության հետ հետագա համագործակցությունն էլ ավելի կզարգանա:

 

Բարձրագույն դատական խորհրդի աշխատակազմի մամուլի և հասարակայնության հետ կապերի ծառայություն

 

 

 

 

image

25.11.2019

ՀԱՅԱՍՏԱՆՈՒՄ Է ԻՏԱԼԻԱՅԻ ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՐԴԻ ՊԱՏՎԻՐԱԿՈՒԹՅՈՒՆԸ

Երկօրյա պաշտոնական այցով Հայաստան ժամանած Իտալիայի Բարձրագույն դատական խորհրդի պատվիրակությունն այսօր՝ նոյեմբերի 25-ին, հյուրընկալվեց Բարձրագույն դատական խորհրդում:

Հայաստանում Իտալիայի արտակարգ և լիազոր դեսպան Վինչենցո Դել Մոնակոյին, Իտալիայի բարձրագույն դատական խորհրդի փոխնախագահ Դեվիթ Էրմինիին, Խորհրդի անդամ Միքելե Չերաբոնային, Խորհրդի անդամ, Վճռաբեկ դատարանի դատավոր Պաոլո Սպազիանիին, Արտաքին հարցերի պատասխանատու Ալեսանդրա Ֆրայեգարիին և պատվիրակության մյուս անդամներին հյուրընկալեցին Բարձրագույն դատական խորհրդի նախագահ Ռուբեն Վարդազարյանը, Խորհրդի անդամներ Գրիգոր Բեքմեզյանը, Լիպարիտ Մելիքջանյանը, Հայկ Հովհաննիսյանը, Վիգեն Քոչարյանը, Մեսրոպ Մակյանը և Սերգեյ Չիչոյանը:

Խորհրդի նախագահ Ռուբեն Վարդազարյանը, ողջունելով հյուրերի առաջին այցը Հայաստան, կարևորեց երկու երկրների դատական իշխանությունների միջև սերտ համագործակցությունը: Նա իր խոսքում նկատեց, որ թեև Հայաստանն ունի դարերի պատմություն, այնուամենայնիվ, Բարձրագույն դատական խորհուրդը բավականին երիտասարդ է, անելիքներ շատ կան, և իտալացի գործընկերների փորձը կարող է օգտակար լինել Հայաստանում դատական իշխանության զարգացման համար:  

Հանդիպմանը Խորհրդի անդամները հյուրերից հետաքրքրվեցին իտալական դատական համակարգի ընդհանուր ֆինանսավորման, բյուջետային հայտերի կազմման, ֆինանսական հոսքերի կառավարման ընթացակարգերով, ինչպես նաև դատավորներին կարգապահական պատասխանտվության ենթարկելու մեխանիզմներին, օրենսդրական կարգավորումներին, դատավորի սոցիալական երաշխիքներին առնչվող հարցերով:

Իտալիայի բարձրագույն դատական խորհրդի փոխնախագահ Դեվի Էրմինին, Խորհրդին շնորհակալություն հայտնելով հյուրընկալության համար, նկատեց, որ արդեն հասցրել են զգալ Հայաստանի պատմության շունչը և ընդգծեց, որ այս այցը կարևոր է երկու երկրների դատական իշխանությունների միջև կապն առավել ամրապնդելու և զարգացնելու համար: Նա իր խոսքում նշեց, որ արդարադատությունն այն մեծ գործիքն է, որը խաղաղ դեր է կատարում ազգերի միջև արդյունավետ փոխգործակցության տեսանկյունից: 

Հայաստանում Իտալիայի արտակարգ և լիազոր դեսպան Վինչենցո Դել Մոնակոն իր շնորհակալական խոսքում ևս նկատեց, որ երկու երկրների միջև համագործակցության հիմքերն ամուր են, և յուրաքանչյուր քայլ, նախաձեռնություն ուղղված է իրավունքի գերակայության ամրապնդման համար:

Հանդիպման ընթացքում տեղի ունեցավ նաև մտքերի փոխանակում, քննարկվեցին երկկողմ հետաքրքրություն ներկայացնող այլ հարցեր: 

 

Բարձրագույն դատական խորհրդի աշխատակազմի մամուլի և հասարակայնության հետ կապերի ծառայություն