Բարձրագույն դատական խորհրդի անդամ Աշոտ Հայրապետյանն ու Դատական դեպարտամենտի ղեկավարի տեղակալ Արուս Հայրապետյանը հանդիպել են Ընտրական համակարգերի միջազգային հիմնադրամի /IFES/ հայաստանյան գրասենյակի տնօրեն Ժերոմ Լեյրոյի գլխավորած պատվիրակությանը։
Հանդիպման նպատակն էր քննարկել համապետական ընտրություններին գրանցվող ընտրական վեճերի դատական կարգով լուծման մեխանիզմները և այդ ուղղությամբ համագործակցության հնարավորությունները։ Աշոտ Հայրապետյանը ներկայացրել է Հայաստանի ընտրական արդարադատության համակարգը՝ պատասխանելով դատավորների վերապատրաստմանն առնչվող հարցերին։ Ժերոմ Լեյրոն առաջարկել է վարչական դատարանի որոշ դատավորների մասնագիտացնել այդ ոլորտում։ Դեպարտամենտի ղեկավարի տեղակալ Արուս Հայրապետյանն անդրադարձել է ընտրական վեճերի բողոքարկման ինստիտուտին՝ շեշտելով, որ բարեփոխումը օրենսդրական լուծումներ է պահանջում։
Զրուցակիցներն անդրադարձել են նաև նախորդ համապետական ընտրությունների ընտրական վեճերի բնույթին։