Նորություններ

RSS
image

10.04.2019

ՀԱՅՏԱՐԱՐՈՒԹՅՈՒՆ

ՀԱՅՏԱՐԱՐՈՒԹՅՈՒՆ ԴԱՏԱՎՈՐՆԵՐԻ ԹԵԿՆԱԾՈՒՆԵՐԻ ՑՈՒՑԱԿԻ ԱՐՏԱՀԵՐԹ ՀԱՄԱԼՐՄԱՆ ՆՊԱՏԱԿՈՎ ԱՆՑԿԱՑՎՈՂ ՈՐԱԿԱՎՈՐՄԱՆ ԳՐԱՎՈՐ ՔՆՆՈՒԹՅԱՆ ԺԱՄԱՆԱԿԻ ԵՎ ՎԱՅՐԻ ՄԱՍԻՆ

 

Հիմք ընդունելով «Հայաստանի Հանրապետության դատական օրենսգիրք» սահմանադրական օրենքի  101-րդ հոդվածի 1-ին մասը` տեղեկացվում է, որ դատավորների թեկնածուների ցուցակի քաղաքացիական, քրեական և վարչական մասնագիտացման բաժինների արտահերթ համալրման նպատակով անցկացվելիք որակավորման գրավոր քննությունները տեղի են ունենալու 2019 թվականի ապրիլի 25-ին` ժամը 10:00-ին (քաղաքացիական մասնագիտացում) և 26-ին` ժամը 10:00-ին (քրեական և վարչական մասնագիտացում)`  ՀՀ փաստաբանական դպրոցի վարչական շենքում (հասցեն` ք. Երևան, Զաքյան 7-3):  

«Հայաստանի Հանրապետության դատական օրենսգիրք» սահմանադրական օրենքի  102-րդ հոդվածի 4-րդ մասի համաձայն` որակավորման գրավոր քննությանը և հարցազրույցին, բացառությամբ Բարձրագույն դատական խորհրդի անդամների միջև հարցազրույցի արդյունքների ամփոփիչ քննարկմանը, կարող են ներկա լինել և դրանց ընթացքին հետևել իրավունքի բնագավառում գործունեություն իրականացնող հասարակական կազմակերպությունների մինչև երեք ներկայացուցիչ՝ ըստ դիմումների ներկայացման ժամանակագրական առաջնահերթության, յուրաքանչյուր հասարակական կազմակերպությունից՝ մեկ ներկայացուցիչ:

Հաշվի առնելով այն հանգամանքը, որ որակավորման գրավոր քննությունները տեղի են ունենալու սույն թվականի ապրիլի 25-ին և 26-ին, ուստի  առաջարկվում է մինչև սույն թվականի ապրիլի 21-ը համապատասխան հայտ ներկայացնել Բարձրագույն դատական խորհուրդ (Խորհրդի աշխատակազմի գրասենյակը գտնվում է ք. Երևան, Վազգեն Սարգսյան 5 հասցեում):

Ի լրումն հրապարակվում է քաղաքացիական մասնագիտացում ունեցող հավակնորդ Մանիկ Սանթրոսյանի կենսագրական տվյալները

ԴԱՏԱՎՈՐՆԵՐԻՆ ԵՎ ԹԵԿՆԱԾՈՒՆԵՐԻՆ

ԱՌՆՉՎՈՂ ՀԱՐՑԵՐԻ ՎԱՐՉՈՒԹՅՈՒՆ              

 

 

ԱՐՏԱՀԵՐԹ ՈՐԱԿԱՎՈՐՄԱՆ ԳՐԱՎՈՐ ՔՆՆՈՒԹՅԱՆ ՆՄՈՒՇ-ՕՐԻՆԱԿՆԵՐ

 

image

10.04.2019

ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՐԴԻ ԳՈՐԾՈՒՆԵՈՒԹՅԱՆ ՄԵԿ ՏԱՐԻՆ

Բարձրագույն դատական խորհուրդն ապրիլի 10-ին կազմակերպել էր ընդունելություն գործունեության մեկ տարվա կապակցությամբ։ Միջոցառմանը ներկա էին ՀՀ վարչապետը, կառավարության անդամներ, ԱԺ պատգամավորներ, դեսպաններ, միջազգային կազմակերպությունների ներկայացուցիչներ, այլ պաշտոնատար անձինք։

Խորհրդի նախագահ Գ․Հարությունյանը, ողջունելով հյուրերին, ներկայացրեց Խորհրդի գործունեության ծավալուն «Տարեկան հաղորդումը», որն ամփոփում է ոչ միայն կատարված աշխատանքը, այլև դատական իշխանության բարեփոխումների ռազմավարական առաջնահերթությունները։

Բարձրագույն դատական խորհրդի գործունեության հիմքում դրված հիմնական սկզբունքները  միտված են անկախ, անաչառ, մատչելի, արդյունավետ, հաշվետվողական, թափանցիկ  արդարադատության իրականացմանը։ Ելակետային է եղել այն համոզմունքը, որ դատական իշխանությունը պետք է դիտարկել ոչ թե որպես ինստիտուտների համակարգ, այլ իշխանությունների բաժանման ու հավասարակշռման համակարգում իր համարժեք տեղն ու դերն ունեցող իշխանություն։

 

Այսօր Բարձրագույն դատական խորհրդի գործունեությունն իրականացվում է համակարգային մոտեցմամբ՝ խնդիրների լուծումը դիտարկելով փոխպայմանավորվածության մեջ, իրականացնելով ծրագրանպատակային քաղաքականություն։

Առանցքային են դատական իշխանության ապակենտրոնացման ու գործունեության իրավական երաշխիքների ամրապնդման, հանրային հաշվետվողականության ապահովման, արդյունավետ արդարադատության նախադրյալների ստեղծման ուղղությամբ ձեռնարկված քայլերը:

Առանձնապես կարևորվում են էլեկտրոնային արդարադատության փուլային ներդրման, դատական գործերի կառավարման ժամանակակից թվայնացված համակարգի արմատավորման, արդարադատության համակարգային մշտադիտարկման ապահովման, արդարադատության ծախսատարության կրճատման, դատական արխիվների և ընթացիկ գործերի ամբողջական թվայնացման համակարգի արմատավորման, դատարանների շենքային ու նյութատեխնիկական պայմանների որակական բարելավման, դատարանների ու դատավորների նյութական ու սոցիալական անկախության անհրաժեշտ ու բավարար երաշխիքների ապահովման, դատավորների օպտիմալ ծանրաբեռնվածության, նրանց գործունեության գնահատման օբյեկտիվ չափանիշների վրա խարսխված համակարգի ներդրման ուղղությամբ տարվող աշխատանքները:

 Միջոցառման ընթացքում անիմացիոն տեսահոլովակների միջոցով ներկայացվեցին մեկ տարվա ընթացքում դատական իշխանության մշտադիտարկման արդյունքներն ու էլեկտրոնային արդարադատության զարգացման ուղենիշները, ճանապարհային քարտեզը։ Ներկայացվեց նաև դատական իշխանության պաշտոնական նոր կայքը։

 

Միջոցառման ավարտին Խորհրդի նախագահ Գ․ Հարությունյանի ուղեկցությամբ վարչապետ Ն. Փաշինյանը շրջայց կատարեց Խորհրդի նոր շենքում։

 

Բարձրագույն դատական խորհրդի մամուլի և հասարակայնության հետ կապերի ծառայություն

image

08.04.2019

ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՐԴՈՒՄ ՏԵՂԻ ՈՒՆԵՑԱՎ ԷԼԵԿՏՐՈՆԱՅԻՆ ԱՐԴԱՐԱԴԱՏՈՒԹՅԱՆ ՄԻԱՍՆԱԿԱՆ ՀԱՄԱԿԱՐԳԻ ՎԵՐԱԲԵՐՅԱԼ ՔՆՆԱՐԿՈՒՄ

Բարձրագույն դատական խորհուրդն ապրիլի 5-ին ընդունեց էլեկտրոնային արդարադատության ոլորտում ճանաչված, ՌԴ էլեկտրոնային արդարադատության համահիմնադիր, հայազգի Ելենա Ավագյանին։ Հանդիպմանը ներկա էին նաև ՄԱԿ-ի Զարգացման ծրագրերի հայաստանյան գրասենյակի ներկայացուցիչներ, տեղեկատվական ոլորտի փորձագետներ։

Բանախոսը ներկայացրեց հայաստանյան գործընկերների հետ համատեղ մշակված այն հիմնական 15 ուղղությունները, որոնք կարևոր են Հայաստանում էլեկտրոնային արդարադատության միասնական համակարգի մշակման և ներդրման համար:

Տարածաշրջանում էլեկտրոնային արդարադատությունն իրականություն է, որի շնորհիվ աշխարհի ցանկացած կետից հնարավոր է հետևել դատական գործընթացներին՝ հայցադիմումների մուտքագրումից մինչև դատական նիստերի օնլայն կազմակերպում։

Ներկաների համոզմամբ՝ էլեկտրոնային արդարադատությունը հնարավորություն կտա ավելի արդյունավետ և թափանցիկ դարձնել արդարադատության իրականացումը։

Բարձրագույն դատական խորհրդի նախագահ Գ․ Հարությունյանը Խորհրդի անունից շնորհակալություն հայտնեց Ելենա Ավագյանին հետաքրքիր ու նյութի բովանդակալից ներկայացման համար։ Նա նաև հավելեց, որ Խորհուրդն այսօր ակտիվ քայլեր է ձեռնարկում էլեկտրոնային արդարադատության միասնական համակարգի ներդրման ուղղությամբ, որի շնորհիվ հնարավոր կլինի տնտեսել տարեկան շուրջ 1մլրդ դրամ:

Քննարկման ավարտին Խորհրդի նախագահը հույս հայտնեց, որ հաջորդ հանդիպմանն առիթ կունենան ներկայացնելու արդեն հայաստանյան փորձը:

 

Բարձրագույն դատական խորհրդի մամուլի և հասարակայնության հետ կապերի ծառայություն

image

01.04.2019

ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴԸ ՄԵՐԺԵԼ Է ԴԱՏԱՎՈՐԻՆ ԿԱՐԳԱՊԱՀԱԿԱՆ ՊԱՏԱՍԽԱՆԱՏՎՈՒԹՅԱՆ ԵՆԹԱՐԿԵԼՈՒ ՄԻՋՆՈՐԴՈՒԹՅՈՒՆԸ

Ապրիլի 1-ին «Հայաստանի Հանրապետության դատական օրենսգիրք» սահմանադրական օրենքի 94-րդ հոդվածի 6-րդ մասի, 154-րդ հոդվածի 4-րդ մասի 2-րդ կետի, 156-րդ հոդվածի 1-ին մասի 1-ին կետի հիման վրա Բարձրագույն դատական խորհուրդը հրապարակեց Արարատի և Վայոց ձորի մարզերի առաջին ատյանի ընդհանուր իրավասության դատարանի դատավոր Թաթուլ Պողոսյանին կարգապահական պատասխանատվության ենթարկելու հարցի վերաբերյալ կայացված որոշման եզրափակիչ մասը:

Բարձրագույն դատական խորհուրդը, դռնփակ նիստում քննության առնելով Հայաստանի Հանրապետության արդարադատության նախարար Ա. Զեյնալյանի 2019 թվականի մարտի 4-ի թիվ 59-Ա որոշմամբ ներկայացված միջնորդությունը, լսելով միջնորդության առնչությամբ Հայաստանի Հանրապետության արդարադատության նախարարի հաղորդումը, Արարատի և Վայոց ձորի մարզերի առաջին ատյանի ընդհանուր իրավասության դատարանի դատավոր Թաթուլ Պողոսյանի բացատրությունը, ուսումնասիրելով կարգապահական վարույթի նյու­թերը և հետազոտելով ապացույցները, որոշեց մերժել այն:

Բարձրագույն դատական խորհուրդը հանգել է այն եզրակացության, որ Հայաստանի Հանրապետության արդարադատության նախարարի միջնորդությամբ արձանագրված խախտումն առկա է, սակայն այն «Հայաստանի Հանրապետության դատական օրենսգիրք» սահմանադրական օրենքի 142-րդ հոդվածի 2-րդ մասի իմաստով չի կարող որակվել որպես ակնհայտ՝ նկատի ունենալով իրավական հիմքերի անկատարությունը և ոչ միասնական դատական պրակտիկան:

 

Բարձրագույն դատական խորհրդի մամուլի և հասարակայնության հետ կապերի ծառայություն