2022 թվականի հունվարի 27-ին Բարձրագույն դատական խորհրդում մեկնարկեց Վերաքննիչ քաղաքացիական դատարանի դատավորներ Կարեն Չիլինգարյանին, Ամրահի Պետրոսյանին, Լևոն Գրիգորյանին կարգապահական պատասխանատվության ենթարկելու հարցի վերաբերյալ միջնորդության քննությունը:

Ըստ Արդարադատության նախարարության հիմնավորման՝ դատավորների կողմից թույլ է տրվել «Քաղաքացիական դատավարության» օրենսգրքի 374-րդ հոդվածի 1-ին մասում ամրագրված պահանջի խախտում:

Այսօրվա նիստի մեկնարկին ԲԴԽ անդամ Լիպարիտ Մելիքջանյանը ինքնաբացարկի միջնորդություն ներկայացրեց, որը Խորհրդի կողմից բավարարվեց:

Արդարադատության նախարարության կողմից բացարկի միջնորդություն ներկայացվեց ԲԴԽ անդամ Ստեփան Միքայելյանին, որը ևս  բավարարվեց:

Արդարադատության նախարարության ներկայացուցիչները ներկայացրին վարույթ հարուցելու հիմքերը, պատասխանեցին հարցերի:

Դատավորների ներկայացուցիչը հայտնեց իրենց հակափաստարկների մի մասը, քանի որ մյուս կողմը ներկայացված փաստաթղթերին ծանոթ չէր վարույթի քննությունը հետաձգվեց:

Այն կշարունակվի փետրվարի 17-ին՝ ժամը  15.00-ին:

2022 թվականի հունվարի 24-ին, Բարձրագույն դատական խորհրդում ավարտվեց Երևան քաղաքի առաջին ատյանի ընդհանուր իրավասության դատարանի դատավոր Արթուր Մրտչյանին կարգապահական պատասխանատվության ենթարկելու հարցի վերաբերյալ  միջնորդության քննությունը, որը ներկայացվել էր Դատավորների ընդհանուր ժողովի էթիկայի և կարգապահական հարցերի հանձնաժողովի կողմից:

Խորհուրդը հեռացավ խորհրդակցական սենյակ՝ որոշում կայացնելու, այն կհրապարակվի փետրվարի 3-ին՝ ժամը 15.00-ին:

Հաշվի առնելով «Դատալեքս» տեղեկատվական համակարգի ժամանակավոր խափանման շուրջ տեղի ունեցող տարատեսակ խոսակցությունները՝ Բարձրագույն դատական խորհուրդը, հայցելով հանրության ներողամտությունը, տեղեկացնում է, որ համակարգի խափանումն ունի զուտ տեխնիկական պատճառներ:

Համակարգի բնականոն աշխատանքի վերականգնման ուղղությամբ ակտիվ աշխատանքներ են տարվում այն սպասարկող ընկերության հետ: Խորհուրդը լիահույս է, որ համակարգի գործունեությունն ամբողջովին կվերականգնվի մոտակա օրերի ընթացքում:

Միևնույն ժամանակ, ցանկանում ենք տեղեկացնել, որ ձեռնարկվում են բոլոր հնարավոր միջոցները՝ հետագայում նմանատիպ խափանումները բացառելու համար: