ԲԴԽ-ն այսօր միաձայն որոշեց բավարարել Կոռուպցիայի կանխարգելման հանձնաժողովի ներկայացրած՝ Վերաքննիչ քաղաքացիական դատարանի դատավոր Գագիկ Խանդանյանի կողմից անհամատեղելիության պահանջները խախտելու վերաբերյալ միջնորդությունը. դատավոր Գագիկ Խանդանյանի լիազորությունները դադարեցվեցին:

Որոշումն ուժի մեջ է մտնում հրապարակման պահից և վերջնական է:

Կոռուպցիայի կանխարգելման հանձնաժողովը եզրակացություն էր ներկայացրել, ըստ որի, Գագիկ Խանդանյանը խախտել է «Հանրային ծառայության մասին» օրենքի 31-րդ հոդվածի 1-ին մասի և «Հայաստանի Հանրապետության Դատական օրենսգիրք» սահմանադրական օրենքի 5-րդ հոդվածի 1-ին մասի պահանջները:

Սեպտեմբերի 30-ին, Արդարադատության ակադեմիայում Բարձրագույն դատական խորհրդի և Միջազգային իրավական համագործակցության գերմանական հիմնադրամի (IRZ) և Եվրոպայի միության համատեղ՝ Արդարադատության համակարգի ամրապնդում ծրագրի շրջանակներում կայացավ «Իրավական ակտերի մշակման հմտություններ» թեմայով հերթական վերապատրաստման դասընթացը: Դասընթացին մասնակցել են ՀՀ բոլոր դատարաններից ներկայացուցիչներ՝ աշխատակազմերի ղեկավարներ, փորձագիտական ծառայության ներկայացուցիչներ, Դատական դեպարտամենտի աշխատակիցներ:

Միջոցառման պատասխանատուները՝ ԲԴԽ ներկայացուցիչ Մարգարիտա Ամյանը և Միջազգային իրավական համագործակցության գերմանական հիմնադրամի (IRZ) ծրագրի վերապատրաստման մասով պատասխանատու Օթիլիա Պակուրարին, ողջունել են մասնակիցներին, կարևորել են թեմայի առաջնային լինելը՝ նշելով, որ իրավական ակտերի մշակման հմտությանը պարտավոր է տիրապետել ցանկացած բնագավառի իրավաբան:

Սեպտեմբերի 30-ին ԲԴԽ-ում ավարտվեց Կոռուպցիայի կանխարգելման հանձնաժողովի կողմից ներկայացված՝ Վերաքննիչ քաղաքացիական դատարանի դատավոր Գագիկ Խանդանյանի կողմից անհամատեղելիության պահանջները խախտելու վերաբերյալ միջնորդության քննությունը:

ԲԴԽ-ն հեռացավ խորհրդակցական սենյակ որոշում կայացնելու:

Այն կհրապարակվի հոկտեմբերի 4-ին, ժամը՝ 15:10-ին:

Սեպտեմբերի 30-ին ԲԴԽ-ում կայացավ Վերաքննիչ քրեական դատարանի դատավոր Սերգեյ Մարաբյանին կարգապահական պատասխանատվության ենթարկելու հարցի վերաբերյալ միջնորդության քննությունը:

Դատավորը միջնորդեց գործի վարույթը կարճել, հարցի շուրջ մյուս կողմի դիրքորոշումը լսելու համար Խորհուրդը նիստը հետաձգեց:

Դատավորին կարգապահական պատասխանատվության ենթարկելու հարցով միջնորդությունը ԲԴԽ-ին է ներկայացրել Արդարադատության նախարարությունը:

Նիստի օրվա և ժամի մասին կտրվի հավելյալ տեղեկություն:

Բարձրագույն դատական խորհրդի նախագահի պաշտոնակատար Գագիկ Ջհանգիրյանը շարունակում է մարզային հանդիպումները:

ԲԴԽ նախագահի պաշտոնակատարն այցելել է Լոռու մարզի Վանաձորի և Ստեփանավանի նստավայրեր, ինչպես նաև Արմավիրի մարզի դատարաններ: Մարզային շրջայցի նպատակը նորանշանակ դատավորների աշխատանքային պայմաններին, ծանրաբեռնվածությանը և այլ խնդիրներին ծանոթանալն էր:

Հայտնի է, որ Ստեփանավանում նշանակվել են սնանկության գործեր քննող երկու դատավորներ, իսկ մյուս նստավայրերում՝ քաղաքացիական գործեր քննող դատավորներ:

Ձմռան նախապատրաստական շրջանում Գագիկ Ջհանգիրյանը ծանոթացել է դատարանների շենքերի առաջ ծառացած առաջնային լուծում պահանջող խնդիրներին, գույքային համալրվածությանը:

Խորհրդի նախագահի պաշտոնակատարը դատավորներին և դատարանների աշխատակազմերին տեղեկացրել է, թե ինչ քայլեր են ձեռնարկվում դատավորների ծանրաբեռնվածության թեթևացման, քաղաքացիական ծառայությունից դատական ծառայության անցման, արխիվացման աշխատանքներն արագացնելու, արխիվացման նոր համակարգի ներդրման ուղղությամբ:

Մարզային հանդիպումները շարունակական են լինելու: