Այսօր՝ սեպտեմբերի 28-ին, ՀՀ Բարձրագույն դատական խորհրդի նախագահի պաշտոնակատար Գագիկ Ջհանգիրյանը և Շվեդիայի ազգային դատարանների վարչության միջազգային կապերի բաժնի ղեկավար, Ստոկհոլմի Վերաքննիչ դատարանի դատավոր Յոնաս Հոգստրոմը հանդիսավոր պայմաններում ստորագրեցին համագործակցության հուշագիր:

Կողմերը պայմանավորվածություն ձեռք բերեցին Հայաստանի Հանրապետության և Շվեդիայի օրենսդրության շրջանակներում իրականացնել փոխշահավետ համագործակցություն ընդհանուր հետաքրքրություն ներկայացնող ոլորտներում՝ իրենց հաստատությունների կատարելագործման և զարգացման նպատակով։

Հուշագրի ստորագրման կարևոր նպատակն է բարձրացնել դատական ​​իշխանության նկատմամբ հանրային վստահությունը, նպաաստել արդարադատության մատչելիության և արդյունավետության ամրապնդմանը:

Հուշագրի շրջանակներում նախատեսվում է համատեղ ծրագրի մշակում, որը կնպաստի Հայաստանում դատավորների և դատավորների թեկնածուների   կարողությունների զարգացմանը, ինչպես նաև դատական ​​վարչարարության, դատավորների և լրատվամիջոցների միջև հաղորդակցության բարելավմանը:

Այսօր՝ սեպտեմբերի 27-ին, ԲԴԽ-ում տեղի ունեցավ Վերաքննիչ քրեական դատարանի դատավոր Սերգեյ Մարաբյանին կարգապահական պատասխանատվության ենթարկելու հարցի վերաբերյալ միջնորդության քննությունը:

Բարձրագույն դատական խորհրդի անդամները, կողմերը, ինչպես նաև՝ նիստերի դահլիճում գտնվող անձիք, նախքան նիստի մեկնարկը, մեկ րոպե լռությամբ հարգեցին 44-օրյա պատերազմի զոհերի հիշատակը:

Նիստի ընթացքում Արդարադատության նախարարության ներկայացուցիչը ներկայացրեց վարույթ հարուցելու հիմքերը, որից հետո դատավոր Սերգեյ Մարաբյանը հայտարարեց, որ պետք է հստակեցվի իրեն կարգապահական պատասխանատվության ենթարկելու մասին միջնորդություն ներկայացրած մարմնի՝ պատշաճ սուբյեկտ լինելու հարցը: 

 Արդարադատության նախարարությանը պարզաբանումներ ներկայացնելու հնարավորություն տալու կապակցությամբ նիստը հետաձգվեց:

Խորհուրդը որոշեց հաջորդ նիստը նշանակել սեպտեմբերի 30-ին, ժամը 17։00-ին:

Այսօր՝ սեպտեմբերի 23-ին, Բարձրագույն դատական խորհրդի նախագահի պաշտոնակատարն ու ԲԴԽ անդամները հանդիպել են Երևան քաղաքի ընդհանուր իրավասութան դատարանի քաղաքացիական գործեր քննող դատավորների հետ:

Հանդիպման ընթացքում քննարկվել են հայցադիմումը ներկայացնելու օրվա դրությամբ նվազագույն աշխատավարձի երկուհազարապատիկը չգերազանցող գումարի բռնագանձման պահանջի և վճարման կարգադրությունների քննության համար դատավորների ենթամասնագիտացում սահմանելու հարցերը:

Քննարկվեց նաև,  թե ինչ ողջամիտ ժամկետ պետք է սահմանվի պարզեցված վարույթների քննության արդյունավետությունը բարձրացնելու համար:

Հանդիպման մասնակիցները շեշտեցին, որ պարզեցված վարույթների առանձնացումը կնպաստի քաղաքացիական գործեր քննող դատավորների ծանրաբեռնվածության թեթևացմանը:

Տեղեկացնում ենք, որ Տավուշի մարզի առաջին ատյանի ընդհանուր իրավասության դատարանում առկա է քաղաքացիական մասնագիտացման դատավորի 1 թափուր հաստիք:

Համապատասխան մասնագիտացում ունեցող առաջին ատյանի դատարանների դատավորները կարող են «Հայաստանի Հանրապետության դատական օրենսգիրք» սահմանադրական օրենքով սահմանված կարգով և ժամկետներում տեղափոխման դիմում ներկայացնել նշված թափուր տեղում նշանակվելու համար՝ իրենց թեկնածությունը քննարկելու նպատակով:

Ծանոթություն: Դիմումները կարող են ներկայացվել ս/թ սեպտեմբերի 25-ը ներառյալ:

Բարձրագույն դատական խորհուրդ

Այսօր՝ սեպտեմբերի 23-ին, Արդարադատության ակադեմիայում կայացավ Բարձրագույն դատական խորհրդի, Միջազգային իրավական համագործակցության գերմանական հիմնադրամի (IRZ) և Եվրոպայի միության համատեղ՝ Արդարադատության համակարգի ամրապնդում ծրագրի շրջանակներում՝ «Հաշտարարության դատական ինստիտուտի վերաբերյալ իրազեկման բարձրացում» թեմայով հերթական վերապատրաստումը:

Դասընթացին մասնակցել են ՀՀ բոլոր դատարաններից ներկայացուցիչներ՝

դատավորների օգնականներ, գործավարներ, փորձագիտական ծառայության

ներկայացուցիչներ, Դատական դեպարտամենտի աշխատակիցներ:

Միջոցառման պատասխանատուները՝ ԲԴԽ ներկայացուցիչ Մարգարիտա Ամյանը և Միջազգային իրավական համագործակցության գերմանական հիմնադրամի (IRZ) ծրագրի վերապատրաստման մասով պատասխանատու Օթիլիա Պակուրարին, ողջունել են մասնակիցներին և ընդգծել Հաշտարարության ինստիտուտի արդիական և կարևոր լինելու հանգամանքը:

Վերապատրաստումները կրելու են շարունակական բնույթ: