Այսօր՝ հունիսի 23-ին, ԲԴԽ-ն հրապարակեց Բարձրագույն դատական խորհրդի նախագահ (լիազորությունները կասեցված) Ռուբեն Վարդազարյանին կարգապահական պատասխանատվության ենթարկելու միջնորդության վերաբերյալ որոշումը:

Խորհուրդը որոշեց բավարարել Հանձնախմբի ներկայացրած միջնորդությունը և Ռուբեն Վարդազարյանի լիազորությունները էական կարգապահական խախտման հիմքով դադարեցնել։

Որոշումն ուժի մեջ է մտնում հրապարակման պահից և վերջնական է:

Որոշումը ստորագրել են ԲԴԽ անդամներ Գ. Ջհանգիրյանը, Գ. Բեքմեզյանը, Դ. Խաչատուրյանը, Մ. Մակյանը, Լ. Մելիքջանյանը, Ա. Մխիթարյանը, Ս. Միքայելյանը, Ս. Չիչոյանը և Վ. Քոչարյանը։

Որոշման պատճառաբանական և եզրափակիչ մասերի վերաբերյալ հատուկ կարծիքներ ունեն Մեսրոպ Մակյանն ու Սերգեյ Չիչոյանը:

Որոշմանը դեմ է Անի Մխիթարյանը, ով ևս ունի հատուկ կարծիք։

    Այսօր՝ հունիսի 21-ին, Բարձրագույն դատական խորհրդի վարչական շենքում կայացել է Միջազգային իրավական համագործակցության գերմանական հիմնադրամի (IRZ) և Դատական դեպարտամենտի 2020-2022թթ. «Հայաստանում արդարադատության համակարգի համախմբում» խորագրով համատեղ գործողությունների ծրագրի ավարտական հանդիպում-քննարկումը:

    Հանդիպման մեկնարկին ողջունելով հյուրերին՝ ԲԴԽ նախագահի պաշտոնակատարը նշել է, որ Խորհրդի համար շատ կարևոր է միջազգային գործընկերների հետ համագործակցությունը. «Ցանկանում եմ շնորհակալություն հայտնել կատարած ահռելի աշխատանքի համար, միևնույն ժամանակ, հույս ունեմ, որ համատեղ նորանոր ծրագրեր կիրականացնենք ապագայում, որոնք նպաստելու են Հայաստանի դատական համակարգի կատարելագործմանը, հանրային վստահության ամրապնդմանը և դատական իշխանության անկախացմանը»:

    Համատեղ ծրագրի իրագործումը կարևորել է նաև Խորհրդի գիտնական անդամ Դավիթ Խաչատուրյանը՝ ընդգծելով, որ ծրագրի շրջանակներում կատարվել են հսկայածավալ աշխատանքներ, որոնք նպաստել են Դատական դեպարտամենտի աշխատակիցների կարողությունների զարգացմանը, նոր գիտելիքների և հմտությունների ձեռք բերմանը:

    IRZ ծրագրի ղեկավար Փիթեր Գյորթլերը և միջազգային փորձագետ, կրթության և վերապատրաստման գծով դոկտոր Օթիլիա Ստեֆանիա Պակուրարին իրենց հերթին շնորհակալություն են հայտնել ԲԴԽ-ին և Դատական դեպարտամենտին արդյունավետ համագործակցության համար և վստահություն հայտնել, որ այն շարունակական է լինելու։

     Ի պատասխան զանգվածային լրատվության միջոցների հարցումների հայտնում ենք, որ Բարձրագույն դատական խորհրդի նախագահի պաշտոնակատարը հացի սեղանի շուրջ տեղի ունեցած մասնավոր զրույցի մանրամասները չի մեկնաբանում: Տեղեկացնում ենք նաև, որ ձայնագրությունը կատարվել է առանց պարոն Գ. Ջհանգիրյանի իմացության:

ԲԴԽ մամուլի և հասարակայնության հետ կապերի ծառայություն

   Հունիսի 17-ին Բարձրագույն դատական խորհրդի նախագահի պաշտոնակատար Գ. Ջհանգիրյանը, Խորհրդի անդամներ Անի Մխիթարյանը, Դավիթ Խաչատուրյանը և Ստեփան Միքայելյանը  մասնակցել են Շվեդիայի կառավարության կողմից ֆինանսավորվող «Հայաստանի դատավորների կարողությունների զարգացում՝ դատական համակարգի նկատմամբ նոր ակնկալիքներին համապատասխանելու և հանրային վստահությունն ամրապնդելու նպատակով» երկարամյա ծրագրի մեկնարկային միջոցառմանը:

   Ողջունելով միջոցառման մասնակիցներին՝ Գ. Ջհանգիրյանը նշել է. «Բարձր գնահատելով հայ-շվեդական համագործակցությունը՝ վստահ եմ, որ դատական համակարգերում փորձի փոխանակումն իր արդյունավետ ազդեցությունը կունենա երկու երկրների իրավական համակարգերի կատարելագործման գործընթացում: Կարևորելով երկուստեք համագործակցությունը՝ ցանկանում եմ նշել, որ ծրագիրը առանցքային նշանակություն ունի մեզ համար, քանի որ  կոչված է նպաստելու  հանրային վստահության բարձրացմանը, դատավորների շրջանում էթիկայի, հակակոռուպցիոն և ներառական հարցերի շուրջ գիտելիքների ամրապնդմանը և խորացմանը, լրատվամիջոցների հետ ինտենիսվ հաղորդակցության հմտությունների զարգացմանը և դատավորների վարկանիշի բարձրացմանը»:

   ԲԴԽ նախագահի պաշտոնակատարն ընդգծել է, որ այսօր դատական իշխանության առաջ ծառացած են մի շարք խնդիրներ և դրանք հաղթահարելու ուղությամբ ԲԴԽ-ն լուրջ ջանքեր է գործադրում. «Դատարաններն այսօր աշխատում են գերծանրաբեռնված, սակայն դրան զուգահեռ  միակողմանի և թերի տեղեկատվության հետևանքով ստվերվում է այն պատասխանատու աշխատանքը, որը կատարում են դատարաններն ու դատավորները։ Մեզ համար կենսական նշանակություն ունի դատավորի խոսքը հասարակության լայն շերտերին հասցնելու հնարավորությունը։ Թվարկածս և մի շարք այլ մասնագիտական և ոլորտային խնդիրների լուծման արդյունավետ գործիքներից է միջազգային երկկողմ և բազմակողմ համագործակցությունը, տվյալ դեպքում Շվեդիայի ազգային դատարանների հետ համատեղ իրագործվող այս ծրագիրը։ Թույլ տվեք ևս մեկ անգամ շնորհակալություն  հայտնել մեր գործընկերներին  և ԲԴԽ անունից վերահաստատել մեր պատրաստակամությունը՝ միջազգային գործընկերների հետ արդյունավետ համագործակցելու ուղղությամբ»,- եզրափակել է նա։

  Պանելային քննարկման ընթացքում դատավորների և լրատվամիջոցների համատեղ աշխատանքի թեմայով բանախոսել է նաև ԲԴԽ գիտնական անդամ Դավիթ Խաչատուրյանը:

  Նա իր ելույթում, ի թիվս այլնի, նշել է, որ լրագրողները ևս դատավորների պես լսում են կողմերին, ուսումնասիրում փաստերը և վեր հանում ճշմարտությունը, սակայն, ի տարբերություն դատավորների, նրանք ոչ թե ակտեր են կայացնում, այլ փաստը հանձնում հանրության դատին:

  Խաչատուրյանը նաև պատասխանել է ներկաների հարցերին:

  Միջոցառմանը մասնակցում էին նաև Արդարադատության ակադեմիայի ռեկտորը, ՀՀ արդարադատության նախարարի տեղակալը, ՀՀ-ում Շվեդիայի Թագավորության արտակարգ և լիազոր դեսպանը, Վճռաբեկ դատարանի դատավորներ, ինչպես նաև Առաջին և Վերաքննիչ դատարանների դատավորներ ՀՀ-ից և Շվեդիայից:

  Միջոցառման մանրամասները՝ տեսանյութում: